La Rejon riconose el VENETO LENGOA

Co gran sodisfasión ve anunsiemo che ieri 28 de marso del 2007 el veneto el xe stà riconosudo ufisialmente cofà LENGOA. Dopo on confronto in aula el Consejo Rejonale el gà votà co solo voti a favór (e on paro de astegnùi) la proposta de leje pa tutelare e valorixare el Patrimonio Lengoìstego del Popolo Veneto. Le fòrse polìtiche in Rejon le gà demostrà na volontà trasversale pa tegner viva la nostra lengoa mare e, soratuto, pa darghe valore riconoséndola finalmente LENGOA. Da uncó tuti i Veneti i pol dire de conósare na lengoa in pì, e i gà el dirito de parlarla in tute le ocaxión de la jornada e de pretèndare che la vegna insegnà anca a le nove jenerasión. Se trata de on rixultado stòrico: la proposta de leje la xera stà sostegnùa fin da subito da tute le asociasion del Coordinamento Asociasión Venete CAV e in particolare da la nostra Asociasión Veneto Nostro - Raixe Venete. Nialtri in particolare ghevimo méso in pie tuta na serie de inisiative sol teritorio e in mexo a la xente pa informare e sensibilixare sora de sto riconosimento: da le prime 3 edisión de la Festa dei Veneti, a la granda manifestasión de l'otobre 2005 a Venèsia, a la racolta firme (5.000) portàe in Rejon a sostegno de la proposta de leje, incontri, volantinaji e tanto altro ncora... Xe na vitoria de chi che ga a core la nostra cultura veneta e la nostra identità: on rixultado stòrico pa tuto el Popolo Veneto. La leje aprovà ieri, oltre a riconósare el Veneto cofà Lengoa, la gà tuta na serie de ponti pa portarla inte i mass-media, pa riserche stòreghe e de toponomàstica e pa rivare a breve a na vera grafia veneta unitaria, solo pa far qualche exenpio. Raixe Venete dedica on spàsio al riconosimento de la lengoa veneta sol so sito riportà qua sóto. Da unco' podemo dire de savér ufisialmente na lengoa in pì! La Redasion de Raixe Venete